كشف النجم المصري عمر مرموش لاعب نادي إينتراخت فرانكفورت الألماني، عن المتاعب التي واجهها في بداية مسيرته الإحترافية، وعن رغبته في اللعب باسم منتخب مصر، ويعرض موقع تحيا مصر التفاصيل.

إحتراف عمر مرموش

قال عمر مرموش: “سافرت أول مرة للسويد وكانت تجربة صعبة، كلمت أهلي وأنا بعيط وقولتلهم أنا عايز أرجع وماكملش بس بعد كدة قولت لازم اقعد وأكمل”.

وتابع عبر برنامج صاحبة السعادة: “أول شهر ليا في السويد بدأت أتعلم ألماني وخلال سنة قدرت أتكلم ألماني كويس، وكنت حابب أعرف كل حاجة عن الألمان وهما أدركوا عقليتي وبدأوا يفهموني أتعامل ازاي”.

وواصل: “أصعب لحظة عدت عليا هي تاني سنة ليا في الاحتراف، لعبت 4 مباريات في سنة واحدة مع فريق الرديف في فولفسبورج الألماني”.

وزاد: “جت فترة قررت أنزل مصر وأرجع لأهلي وصحابي، وحسيت إن حلمي بيبعد وإني مش هقدر أحققه، لكن بعد كدة ثقتي في نفسي رجعت وقولت لازم أقعد واشتغل على نفسي أكتر”.

وأكد: “اشتغلت على نفسي كتير لحد ما أقنعت مدرب الناشئين بإمكانياتي، وحجزت مكان أساسي، وتم تصعيدي للفريق الأول، ومن هنا كانت الإنطلاقة”.

وصرح: “مدرب منتخب كندا كلمني عشان ألعب في صفوف منتخبهم، بعد تألقي مع فولفسبورج، وأنا رفضت عشان كنت حابب ألعب بإسم منتخب مصر”.

احترافية عمر مرموش

وأشار عمر مرموش: “أنا مدرب نفسي وعارف جسمي بيحتاج ايه وإيه اللي ناقصني، وببقى نفسي أكل الأكل المصري زي الملوخية وغيره بس بوقف نفسي”.

وأتم: “كل أسبوع بنتوزن في النادي وبنشوف نسبة الدهون في الجسم قد إيه، ولما عملت تحاليل عرفت إن اللبن بيعملي التهابات عشان كدة بطلت أشربه”.

انتقال عمر مرموش إلى مانشستر سيتي

وذكرت شبكة RMC Sport الفرنسية، أن نادي مانشستر سيتي اتفق بشكل نهائي مع آينتراخت فرانكفورت للتعاقد مع الدولي المصري عمر مرموش.

ويتبقى فقط بعد التفاصيل النهائية من أجل الإعلان الرسمي من جانب فريق مانشستر سيتي للتعاقد مع عمر مرموش لاعب فريق آينتراخت فرانكفورت.

ويقترب عمر مرموش من الغياب عن مباراة آينتراخت فرانكفورت وبوروسيا دورتموند في الدوري الألماني غداً الجمعة.

لكن المؤكد أنه لم يتم حسم الصفقة حتى الآن بشكل كامل، ولكن هناك أمل كبير داخل مانشستر سيتي في حسم الصفقة خلال الساعات المقبلة.