مشية عزّك كبيري

ونحنا صغار

وكيف لحتى توفيك الكلمي

والكلمي من اسمك بتغار

قاطع

بتّار

واضح متل عزّ النهار

حكيم.. يا حكمة علي

وطبّك فعايل ذو الفِقَار

وروبك متل قلبك ناصع

حتى وهوي ملطّخ ناصع

وحتى وهوي مقطّع ناصع

ووچ الحكّام

يا حسام

متل نعل الإسكربيني

طين وسخام

وشحّار

وچ العرب كلّو شحّار

العمى

ما عاد فيون حرّ يغار

حتى خنزير البراري

حمي دمو ف شرايينو

وفار

لك عار

والله عار

يبقى فينا واحد متلك

ونهتف لولاد الحرام

حسام

سير بدربك

الأقصى بيّك

وغزّة إمّك

وبكرة لما بتلقى ربّك

رح يفصلّك

جني نورا نورو لوچّك

وإلنا نار

حطبا بشر وحجار

وشجب

وندب

واستنكار

وعلاك الكلام

يا حسام!