وجه المطرب المصري تامر حسني نصيحة لجمهوره بضرورة الالتزام بالصلاة، مؤكدًا أن الصلاة كانت السبب الرئيسي في تحقيق نجاحاته وأحلامه. وأوضح حسني أنه ليس إمامًا أو شيخًا، إلا أن إيمانه بقوة الصلاة في حياته كان العامل الأساسي في استمراره وتفوقه. كما أشار إلى أن الصلاة تساهم في تهذيب النفس وتمنع الإنسان من الانخراط في الأفعال المكروهة.

وقال تامر حسني: “والله والله اللي بيقوله صح أنا مش شيخ ولا عامل بنصح أنا بتكلم عن حاجات مريت بيها في حياتي وكانت من أسباب وصولي لحلمي التمسك بالصلاة أيا كنت بتعمل إيه واوعى تقول ربنا مش هيقبل صلاتي.. واوعى تصدق اللي يقولك كده إوعى تحكم انت على ربنا وتشك في رحمته إنه مش هيقبل لا لااااااا دا غلط كبير ربنا أكرم وأرحم من ما تتخيل”.

وأضاف: “مهما أي غلط بتعمله مسير صلاتك تخليك تقلل أخطاء وواحده واحده لحد ما تبقى في المسار السليم اللي برضوا هيكون فيه أخطاء ولكن أقل ويتبعها إستغفار وتصدق وتوبه حتى لو رجعت تاني لنفس الأخطاء ورجعت عاشر ومليون ارجع تاني ومليون لربنا وأطلب منه العفو والمغفرة المهم تخليه قدام عينك طول حياتك”.

وتابع: “خلوا بالكوا في أفكار بتسوق العالم ناحية إن الشخص المتدين أو الملتزم أو اللي محافظ على صلاته إنه يتكسف يقول ده قدام الناس لإن ممكن أصحابه يضايقوه بالكلام بما إن الجانب الشيطاني بقى قوي أوي في العصر ده”.

وأختتم: “بس إحنا لازم نقاوم النوع ده من الفكر ونفتخر إننا بنصلي وبنركع لواحد بس وهو الله سبحانه وتعالى ومهما علا شأننا ومهما عملنا ذنوب بنركع برضو وبنتوب ونستغفر ونشكره على كل حال ونطلب منه اللي بنحلم بيه ونثق إنه هيرزقنا إذا كان بيرزق الجنين في بطن أمه والنملة في جحرها والطيور في السما”.